Nog ’n belangrike eienskap wat God in ons lewens wil sien, is vreugde en blydskap. Blydskap in my lewe sal my meer soos Jesus maak, en dit is wie ek moet word. “Jesus, Man of Joy,” het iemand Hom eendag so mooi beskryf.
God seën ons met omstandighede wat blydskap in ons lewens bring. Ware blydskap word egter nie in die omstandighede self gevind nie, maar in die oorsprong daarvan. Vreugde word ook gevind wanneer ons God se Woord uitleef en op die beloftes vertrou wat Hy daarin aan ons gee. Die psalmdigter verklaar hierdie waarheid met groot vertroue in Psalm 16, met die opskrif “By die Here is vreugde”. In die Ou Testament het die mense dikwels op God se seëninge gereageer met vreugdevolle feesvieringe. Die jaarlikse Fees van die Tabernakels het veral ’n geleentheid vir die Israeliete geskep om God se goedheid te vier.
Net so het Jesus se dissipels vreugde in donker tye gevind toe hulle hulle vir Jesus se dood voorberei het. ’n Paar uur voor Sy kruisiging verseker Jesus Sy dissipels dat hulle hartseer gou in blydskap sal verander—binne drie dae, om presies te wees (Johannes 16:20)—want Jesus sou uit die dood opstaan. Die apostel Paulus skryf ’n vreugdevolle brief terwyl hy in kettings in die gevangenis is. In ’n passievolle brief aan die kerk in Filippi vind Paulus vreugde in Christus. Hy vind vreugde ongeag sy omstandighede. Hy beskou selfs sy gevangenskap as ’n seën, omdat dit help om die evangelie te versprei. Net soos Paulus leer Petrus Christene wat deur Asië versprei is dat gelowiges blydskap kan hê ongeag hulle omstandighede.
Dieselfde geld vir gelowiges vandag, want Petrus sê in 1 Petrus 1:6: “Hieroor kan julle baie bly wees, al moet die baie beproewings julle vir ’n rukkie laat swaarkry.” Beproewings wys die egtheid van geloof. So word ons geloof getoets, en wanneer dit die toets deurstaan, loop dit uit op lof en heerlikheid aan Jesus—en uiteindelik op vreugde en blydskap oor Jesus in my lewe.
Ja, dit is belangrik om te onthou: vreugde en blydskap vind jy in Jesus Christus alleen—dikwels ten spyte van moeilike omstandighede.
Geskryf deur Hendrik Nel